لماذا نرى بأن حلقة Star King مسيئة؟

1٬423

كلنا تضايقنا من آخر حلقة عرضت من برنامج Star King .. لكن صراحة اللي فاجئني بقوة ردة فعل بعض البنات الغريبة !! اللي تقول ما سوو شي واللي تقول طيب احنا كذا ما قالوا شي غلط وإلا بعض أصحاب المدونات اللي جالسين يبررون بشكل فظيع لهم ويقولوا إن البنت اعتذرت ومن هالكلام.

أولاً: البنت ما نشرت اعتذار رسمي أبداً .. كل السالفة إنها ردت على رسالة وحدة من البنات (حطوا في بالكم رسالة خاصة) وهذا ما أعتبره اعتذار.
ثانياً: أنا ما أبي أي اعتذار من البنت هذي لأنها وحدة ناكرة للعشرة وللدولة اللي احتضنتها السنوات اللي راحت احنا نبي القناة نفسها تعتذر وللعلم ما في ولا جهة رسمية اعتذرت لا برنامج ستار كينغ ولا قناة SBS

الحين بأرد على البنات اللي يرقعولهم ويقولوا إنهم ما سوو شي واحنا كبرنا السالفة:

  1. غلط x غلط إنهم يجيبوا بنت امريكية كورية تمثل دولة مو دولتها وتتكلم عنها لأنها بس عاشت فيها لـ 10 سنين.
  2. طيب نقول عاشت عندنا وكل شي وش دخلها تدخل المسرح بعباية وتسوي هالمهزلة على المسرح وهي لا هي مسلمة ولا لها دخل بالعبايات وطاريها؟ كان بإمكانها من البداية تدخل بفستانها وتغني ويا دار ما دخلك شر ومع السواليف لو حابة تقول إنها عاشت في السعودية لـ 10 سنوات هي حرة تقول.
  3. سالفة (حرام حرام) وأخوها اللي طالع بالسلاح .. ايش المغزى من هالحركة؟؟ نرجع ونقول مالها دخل تمثل السعودية وعاداتها وتقاليدها أبداً أبداً أبداً.
  4. إذا كانوا حقيقي فيهم فضول لإكتشاف حضارتنا ومعرفة عاداتنا وتقاليدنا يقدروا يتكلموا عنّا محد بمانعهم لكن بطريقة مهذبة و في برامج وثائقية جادة زي العالم والناس مو برنامج سخيف مثل ستار كينغ على كل كلمة والثانية طاحوا ضحك .. هذي صراحة إهانة لنا واستهزاء مو تعريف بحضارتنا.

تذكرت سالفة الفلبينيين يوم ازعلوا من Lee Da Hae وطالبوها بإعتذار رسمي وما سكتوا أبداً عن حقهم. للي ما يعرف السالفة Lee Da Hae كانت مستضافة في برنامج وقالولها تتكلم باللغة الإنجليزية بلكنات مختلفة تكلمت بلكنة إمريكية وبريطانية وفلبينية. وهذا هو المقطع:

httpv://www.youtube.com/watch?v=QDtEoKDLV6E

على إن موقف الفلبينيين لا يقارن أبداً بالمهزلة اللي سووها في ستار كينغ إلا إنهم قوموا الدنيا وما قعدوها وفي النهاية اعتذرتلهم Lee Da Hae اعتذار رسمي وتأسفت. وهذا هو خبر إعتذارها:

http://www.allkpop.com/2010/11/lee-da-hae-makes-an-apology-to-filipinos-for-her-imitation

طيب الحين صدق صدق الفلبينيين مو كذا يتكلموا؟ طيب ليش يزعلوا؟ مو هذي هي لكنتهم!!
أنا أقلكم ليش الفلبينيين حسوا بالإهانة. لو لاحظتم لم قلدت اللكنة الإمريكية عجبهم تقليدها وقالو جيد، جيد ونفس الشي لم قلدت اللكنة البريطانية بس يوم جت تقلد اللكنة الفلبينية قلدتها بطريقة تريقة و افطسوا ضحك كل الموجودين وهذي قلة أدب منهم.

الناس بطبيعة الحال ما يحبوا أحد غريب يتدخل في حياتهم ويتلكم عن اللي ما يخصه (شي بفطرتنا) .. إنتي بنفسك حتى لو كنتي معترفة بعيوبك الشخصية (نقول مثلاً إنك دبدوبة) ما راح يعجبك إن الناس ماخذتك نكتة بسبب وزنك الزائد أو تسمعي كلمة ع الطالعة والنازلة بسبب السمنة. إنتي معترفة إن وزنك زائد وتعرفي في قرارة نفسك إنك محتاجة تنحفي وتهتمي بصحتك لكن في نفس الوقت ما تحبي الناس تتكلم عن هذا الشي وتبيهم يحترموك ويراعوا مشاعرك صح ولا لا؟

أنا ما أقول روحوا سبوا واشتموا .. اللي نبيه هو إعتذار من قناة SBS وبرنامج  Star King

بالنسبة لليتوك أنا أشوف إنه ماله دخل في السالفة لأنه معروف إن مشاهير كوريا تتحكم فيهم وكالاتهم في كل صغيرة وكبيرة ولا يقدروا يسووا أي شي من غير تخطيط الوكالة نفسها بالذات شركة SM فأتوقع إنهم خلوا ليتوك يطلع لأنه أكثر شخصية محبوبة عند السعوديات.. ومن رأيي لا تطالبوه بأي شي ولا تتكلموا عليه طالبوا القناة نفسها والبرنامج.

الواقع هو إنه احتمال كبير 99% ما راح يعتذروا ولا راح يعبرونا .. صحيح هم صاروا يعرفوا إن فيه معجبين عرب مهتمين فيهم وفي مشاهيرهم لكن إلى الحين احنا مالنا أي قيمة عندهم. ليش؟
لأنهم ما يستفيدوا مادياً مننا يعني لا ألبومات تنباع عندنا ولا فيه فرق ييجوا ويقيموا حفلات هنا ولا احنا اللي نشتري أغانيهم ودراماتهم من النت يعني صحيح معجبين لكن في نظر الشركات ولا شي. نزعل ولا نرضى ما تفرق معهم.
لو كانوا يربحوا من ورانا نقول 20% من مجمل أرباحهم والله العظيم ما راح يفكروا حتى التفكير إنهم يعرضوا حلقة مثل هذي لأن وقتها راح يكون زعلنا غالي .. علشان كذا يراعوا دول شرق آسيا مثل الفلبين وتايلند وأندونيسيا والصين واليابان ودول أوروبا وإمريكا وإذا صار وغلطوا غلطة مثل اللي سوتها لي دا هي يبادروا بالإعتذار بأسرع وقت ومن دون تفكير.

التعليقات